新聞類別
財經
詳情#
【明報專訊】比亞迪股份（1211）股價一插再插，噚日再跌8個巴仙，去到14.84蚊價位，再咁跌落去，睇怕好快就會去到股神巴菲特當年入貨價8蚊水位，所以大家都猜測股神究竟幾時會忍唔住賣股。之不過，噚日《路透社》就引述一個揸住巴郡股票，叫Michael嘅財富顧問公司首席執行經理話，股神唔單止唔會賣股票，反而好可能趁比亞迪股價繼續走低，索性再畀多啲錢，收購成間公司咁話。
股神被指「愚忠」於某啲投資
路透社篇文仲好唔客氣咁批評巴菲特，話佢雖然係一個好偉大嘅投資者，但有時都會好似食錯藥咁「愚忠」於某啲投資，而家佢就食錯咗隻叫「比亞迪」嘅毒藥，唔係又點會講到明比亞迪股票係成世唔放。
另一位叫Steve嘅基金管理公司首席投資官，就將矛頭指向巴郡副總裁芒格（Charles Munger），因為當日就係佢向股神極力推薦比亞迪。Steve話，芒格係被比亞迪嘅營運模式同員工嘅勤奮所深深吸引，所以Steve都認為，芒格會傾向繼續增持比亞迪多於賣股。
對於呢個傳聞，比亞迪深圳總部嘅發言人就話從未聽過股神會買起公司，亦唔覺老闆王傳福有提過，認為路透社嘅報道真確性成疑。但係呢，王傳福前日響業績會就咁講過，巴菲特增持定減持，係屬於股神個人嘅事，唔到佢評論喎。
小琴又咁諗，如果股神講口齒，咁佢將比亞迪私有化嘅機會又唔可以話冇嘅，因為只要佢買起咗間公司，自然肯定會成世人都揸住，咁就唔使怕人話佢食言啦。
報料電郵﹕piano@mingpao.com
留言 (0)
