安踏搵NBA訪華 一舉N得

【明報專訊】NBA（美國職業男子籃球聯賽）係內地最受歡迎嘅體育賽事之一，NBA球星更加係好多內地青少年嘅偶像。擁有多名NBA球星代言人嘅安踏體育（2020），近期就安排旗下最大牌、來自波士頓塞爾特人隊嘅加納特（Kevin Garnett）來華，進行10天嘅訪問。據小琴了解，加納特呢次中國行去咗廣州、武漢、瀋陽及北京四地，其間不但同球迷見面同埋互動，仲喺逗留北京期間親自指導北京工業大學嘅年輕球員打波。身為籃球員嘅加納特，自然唔少得落場獻技，聽講佢係北京仲同當地傳媒隊真刀真槍鬥咗場比賽。

除咗推廣籃球，安踏今次仲安排咗加納特參加公益活動。小琴聽聞佢喺瀋陽個陣，探訪咗當地嘅特殊學校，仲同自閉症嘅學生一同上體育堂，之後又送咗一批運動裝備同學習用品畀佢地，鼓勵佢地努力學習知識，積極參與體育鍛煉。安踏咁嘅營銷方式，不但圓咗球迷一睹球星風采嘅夢，又幫到弱勢群體，同時又宣傳咗公司品牌，真係一舉多得。