寶哥哥爭東亞唔執輸

【明報專訊】東亞銀行（0023）上半年業績對辦，令股東同埋投資者都對公司有信心，一向玩開股權爭霸戰嘅國浩（0053）同西班牙銀行CaixaBank輪流增持東亞之後，寶哥哥李國寶都唔執輸，分別喺上星期二及星期五入市，共斥353萬增持12萬股，依家持股升至2.94％。

根據聯交所股權資料，東亞銀行主席兼行政總裁李國寶，喺8月16日及18日，喺場內共斥約353萬元入市增持東亞12萬股，其中2萬股係按每股平均價27.975元買入，另外10萬股就按每股29.738元購入，增持之後，寶哥哥持股量就由2.93％升至2.94％。

斥353萬增持

東亞喺今個月初公布業績後，盈利又多過預期，加上增加派息，唔少券商都唱好。而國浩同埋CaixaBank就喺10號同12號輪流增持。國浩喺10日斥資逾4000萬元增持東亞140萬股，令持股量增加至12.04%。CaixaBank之後喺12日出手增持東亞138萬股，涉及3903萬元，持股量增加到16.03％。

近期歐債陰霾籠罩港股，大部分銀行股都冇運行，不過股東相繼增持東亞，就唔多唔少對股價起到支持作用。東亞噚日就收報29.4元，升0.53元或1.84%，成交8460萬元。

報料電郵﹕piano@mingpao.com