怕瓜田李下 陳啟峰急掟耀才

【明報專訊】俗語有話打工無出頭，所以香港地唔小打工仔都會買吓股票當做投資，撞啱自己公司上市，有時買返啲公司股票支持吓亦都唔奇，好似耀才（1428）執董兼行政總裁陳啟峰上星期都買咗少少耀才股票，不過奇就奇在佢隔唔夠一個星期就全部沽晒，即時引發小琴不少聯想：唔通佢事業有新發展？

買完一星期唔夠沽清

小琴噚日望到聯交所股權資料披露，陳啟峰響上個星期四（11日）入市買咗40.4萬股耀才股票，但隔唔夠一個禮拜就喺今個星期二（16日）全部沽晒，一來一回未計手續費都賺唔夠7700蚊，睇返陳生上年年薪接近200萬，小琴心諗佢咁嘅人工沽貨肯定唔係為錢，咁莫非係有乜嘢內情？

既然有疑問，小琴當然即時打畀陳啟峰問個明白，佢就即時話家喺耀才做得好開心，沽貨亦都唔係等錢使，陳生話上個星期買貨，其實係睇好公司發展，家股價咁低好抵買咁話，不過佢買完之後就覺得「唔係咁啱數」，皆因佢作為資深股評人兼公司管理層，正所謂「瓜田李下，事避嫌疑」，揸返自己公司股票話唔定可能會有利益衝突，於是索性快快手沽咗佢喎。