潤地因獲注資遲大到

【明報專訊】華潤置地（1109）業績會又唱空城計。尋日下晝5點，記者準時來到華潤大廈46樓。圍住圓桌，記者已座無虛席，然而不見管理層蹤迹，亦未收到任何資料。要等到5點50分，董事長王印終於現身，相機埋位，攝記高呼：「開飯了！」

王總通情達理 畀記者問多幾條問題

王印解釋，由於集團獲母公司注資，要等港交所公告，所以遲咗。如果check番潤地嘅往績，潤地要記者久等才開記者會，已不是第一次，「遲到天王」呢個稱號佢應該當得起。

提問環節開始無幾耐，諸位行家仲熱緊身，財務總監就突然宣布，由於眾多分析員喺外邊等候，記者會到此為止。一眾行家目瞪口呆，包括明報記者準備嘅問題仲一條都未問，情急之下同公司理論：「我哋仲以為記者會係剛剛開始，無理由等50分鐘問5分鐘就散會呱。」王總算通情達理，即時話畀記者問完先，仲提議將管理層分為兩組，一組同記者繼續傾，一組應對分析員。匆匆答完幾個問題後，記者會完結，分析員如同潮水一般擁入來，會議室即時迫爆，主家潤地又要再張羅座椅，應付新一輪混亂。