【明報專訊】近日內地媒體界可謂腥風血雨，箭靶仲竟然係內地科網巨人百度創辦人李彥宏，事緣央視啱啱喺近排連續兩日播映咗個特輯，踢爆百度對旗下嘅網站監管不力，竟然容許網民公開其他人嘅私人資料，仲畀廣告客戶公然賣假飛機票、違禁藥物，甚至有啲客戶用假商業登記證申請登廣告都一樣接受，毫無事前審核。
小琴發現呢單猛料惹嚟唔少內地網民激烈討論，有網民就話百度廣告收入急速膨脹惹嚟傳媒老大央視眼紅，仲將問題層次提升到新舊媒體之爭，你都咪話唔爆。
斥監管網站廣告不力
央視連續兩日爆百度大鑊，矛頭直指百度對旗下網站廣告監管不力，除咗唔理客戶賣嘅嘢真定假、合唔合法之外，甚至有客仔偽造商業登記登廣告，央視最後仲打埋煽情牌，話有位清華大學教授喺「百度貼吧」畀網民開咗個topic「狂轟」幾年，當中不少是粗言穢語，問候人哋全家兼祖宗十八代，並公開晒教授嘅電話、電郵同地址，搞到佢長期嚟不停畀人滋擾，最後要求百度刪除該貼吧，百度竟然拒絕，真係慘絕人寰。央視嘅報道就轟百度利用這些甚激嘅貼吧增加點擊率，賣廣告賺取「不義之財」，又揭發貼吧每年為百度帶來數億元嘅收入。
呢單嘢唔單止內地迴響好大，仲連累埋遠在美國上市嘅一批中國科網股，出現咗個小股災。百度前晚跌5.3%就理所當然，但估唔到連新浪、優酷同人人網股價都齊齊插水，其中新浪就最無辜，股價一夜之間跌咗7.9%，甚至連美資大行摩根大通噚日都為咗央視單料出報告，警告客戶小心負面消息對百度股價影響。
小琴見內地唔少論壇都有討論呢件事件，網民都集中喺央視連續兩日「恐怖襲擊」百度嘅動機，有天涯網網民就覺得件事可能同兩大新舊媒體廣告競爭有關，佢話百度呢幾年廣告收入幾何級數一樣咁增長，今年估計會超過120億元人民幣，央視上年廣告招標金額雖然大升15%到109億元人民幣，但係一個唔小心都隨時跑輸畀百度，唔知係咪因為咁百度就惹嚟央視眼紅。
報料電郵﹕piano@mingpao.com
