比亞迪副總裁辭職 原因眾說紛紜

【明報專訊】一直受到業績下滑困擾嘅比亞迪（1211）高層出現變動，昨晚發通告指出，公司副總裁兼比亞迪汽車銷售公司總經理夏治冰因個人原因辭職。

雖然通告就話夏治冰辭職唔會對公司營運帶來影響，但小琴認為，作為比亞迪汽車銷售總經理，佢嘅離開肯定影響深遠，特別係自今年以來，比亞迪汽車銷量連續6個月同比下滑，上半年業績鐵定唔會好睇。夏治冰離開，亦可能同工作壓力有關。

「業內人士」：才華難展 黯然求去

市場上亦對今次人事變動有好多講法，市傳有「比亞迪內部人士」透露，夏治冰因為「學習深造」而走，其職由生產經營計劃處總經理侯雁接任；亦有「業內人士」話，比亞迪之前回歸A股，將資金投向新能源汽車，但呢個市場嘅銷量始終未能成功突破，令夏治冰嘅營銷才能無得充分發揮，所以先黯然求去。