惠理人棄我取 增持南車時代

【明報專訊】早排民企風暴搞到唔少出名嘅基金經理「中伏」，連「沽神」John Paulson都話輸到怕怕，話要請個「中國專家」返嚟，先敢再投資中國企業。不過同樣畀民企搞到損手爛腳嘅惠理基金（0806）就無有怕，甚至乎連近排無人敢掂嘅「高鐵概念股」都繼續照買可也。

早前掂民企股 搞到損手爛腳

近排關於中國公司嘅麻煩都可謂「一波未平，一波又起」，民企風暴早排燒到冚冚聲，之後又發生溫州高鐵追撞事故，搞到連高鐵概念股，好似中國智能交通（1900）、中國自動化（0569）隻隻股價都大插特插，連份屬國企嘅南車時代（3898），基金一樣照沽無面畀。

不過，小琴噚日睇到聯交所資料，原來惠理啱啱呢個星期一（1日）入市增持咗183.7萬股南車時代，以每股平均價22.506元計，即係用咗超過4100萬買貨，真係勇氣可嘉，而且首次披露持股逾5％，達5.29％。其實雖然惠理早排畀幾隻民企股搞到損手爛腳，但係其實年初表現唔錯，又等小琴睇吓惠理今次眼光準唔準先。