高朋網半年極速瘦身

【明報專訊】內地做生意如果唔識國情，好容易啞子食黃蓮。好似美國團購網鼻祖Groupon同騰訊（0700）合營嘅「高朋網」，入鄉啱啱半年就遇滑鐵盧，唔單止要撤出三線城市，仲偷偷摸摸裁人，做到咁肉酸，都係因為頂唔住中國人嘅「翻版功夫」。

團購網嘅生意模式太易複製，又幾乎唔使開業成本，所以由第1間「美團網」繁殖到家，內地大大話話有5000間，都淨係用咗1年時間。團友攞到低至1折優惠後，網站可分到商家一成佣金，毛利率一時高達兩成。

半年前Groupon就係抵唔住內地肥水太誘人，風塵僕僕越洋而來。搵到網站一哥騰訊做合作伙伴，成為一時佳話，騰訊股價亦曾經炒過一轉。但係天時不利，估唔到一失腳就跌入「千團混戰」。根據內地《21世紀經濟新聞》報道，經過一輪激戰後，高朋網毛利率猛跌到5%，規模細啲嘅都退出舞台。Groupon最慘嘅係「入鄉」時用3倍人工挖角請人，搞到走投無路只好瘦身。

入鄉時 用3倍人工挖角

其實外企水土不服不嬲都有，不時可見友人趾高氣揚來，灰頭土面走。Groupon今年仲係美國最期待嘅科技新股，不過因審查瑕疵已推遲上市。小琴就借用「渾水金童」Carson Block嘅一句說話：「中國係世界上最難做生意嘅地方，一旦你賺咗錢，就會有10個競爭者嚟複製你嘅生意模式。」

報料電郵﹕piano@mingpao.com