畀女記者扑咪 郭台銘出手唔出口

【明報專訊】昨日收到風話富士康（2038）董事長郭台銘（圖）將現身香港，支持江蘇省鹽城市招商，大批行家聞訊而至，但鹽城市政府可能唔了解香港媒體嘅運作，連呃帶騙咁一時又話郭台銘唔到，一時又話佢遲到，多種理由想支開記者。

只係最終記者都發現郭董身影，原來佢唔單止冇遲到，仲喺度接受江蘇省電視台獨家採訪，呢個時候大家都唔顧得鹽城市政府嘅安排，全速衝向郭董「扑咪」。聽完郭董回答省政府媒體嘅「官話」之後，有香港女行家立即問郭董係咪9月出iPhone 5，對公司有冇影響。

郭董聽完問題，面帶微笑，仲握住嗰名女行家嘅手，當大家都以為佢呢個舉動，代表將有嘢講之際，誰不知郭董使出一招「笑而不答」，咩都冇講就走咗。

由於唔知郭董係咪未走，記者們唯有繼續苦等，但係一來既冇鹽城市政府嘅人出來交代，酒店又只係當記者「犯人」咁看管，結果大家被「陰乾」，最後有地方官員話所有人走晒，先知郭董已不在。