4公司董事罰再培訓

【明報專訊】小琴不嬲都覺得人犯錯唔緊要，最緊要能夠改過，好似昨日港交所（0388）就一次過公布有4家上市公司嘅董事或者前董事違規，喺業績前禁售期買賣公司股份，裁定都要上返24個鐘嘅企業管治培訓課程，正所謂「知錯能改，善莫大焉」，四名董事仲可以「有伴」齊齊上堂，豈不快哉？

兩董事：以為禁售期會延遲

港交所公布嘅四間公司之中，最高知名度嘅都可以算係「星爺」周星馳任大股東嘅比高（8220），其餘美亞（0391）、中國天化工（0362）同華潤微電子（0597）都同樣係細價股，其中比高董事張爾泉同華潤微電子前董事朱金坤，分別喺公司公布2009業績前1個月，賣股套現咗467萬同180萬。

至於美亞同中國天化工口嘅case就有小小灰色地帶，兩間公司董事李國興同陳遠東就解釋，因為業績公布日子延遲咗，以為禁售期都一樣延遲，點知港交所原來唔批准而齊齊中招。

錯咗就要罰，港交所就話四名違規董事都要喺公布發出起嘅限定時間內，上返24個鐘企業管治培訓，小琴好少見港交所會一日內公布4家上市公司嘅董事違反禁售期，但心諗其實都無壞，四名董事唔單止上堂有個伴，話唔定報課程嗰陣仲可以因為多幾個人報名而有Discount呢。

報料電郵﹕piano@mingpao.com