國美黃光裕 競投英退役航母

【明報專訊】國美（0493）爭拗隨住陳曉黯然辭職而完結，不過仲喺獄中服刑嘅大股東黃光裕就動作多多，最新消息係佢參與競投英國退役航空母艦「皇家方舟號」，將用來做流動展館、新產品首發或者休閒旅遊式購物。

內地傳媒報道，黃光裕（圖）旗下一間註冊公司Eagle Vantage競投緊呢艘皇家方舟號，競投結果將會喺7月中公布。作為無敵級航母一員，呢艘1985年服役嘅皇家方舟號長209.1米，寬36米，滿載排水量超過2萬噸，喺去年正式退役。

擬改建世界最大流動展館

對於黃光裕參與競投航母，國美副總裁何陽青就證實，聽講過呢次競投。佢話，Eagle Vantage競購航母係值得關注嘅商業動作，仲話國美對呢種創新的項目平台都有興趣喎。

至於Eagle Vantage今次競購項目負責人趙啓光就話，今次參與競投皇家方舟號，係根據公司業務拓展需求嘅一次嘗試，如果競購成功，會將航母改建成為世界最大嘅流動展館。之前黃光裕話要注入自己私人旗下近400間門店去上市公司，唔知買咗隻航母後，又會唔會注入國美度呢。