科學狂人爆粗 狂炳中聚

【明報專訊】中聚電池（0729）同「科學狂人」鍾馨稼都算係冤家，前日中聚就出通告，話懷疑鍾馨稼向深圳法院遞交嘅文件係偽造，鍾博士噚日就好嬲，一口流俐廣東話不時夾雜粗口，狂轟中聚現任管理層：「佢哋講乜Ｘ都得㗎啦！」

早排改名同鍾博士劃清界線嘅中聚，自從同主要股東兼前副主席鍾馨稼決裂後，大玩「你告我，我又告返你」嘅遊戲，中聚響香港入稟告鍾博士違約，鍾博士上月又響深圳入稟反告中聚違約，直到前日中聚又公布，話認為鍾博士向深圳法院遞交嘅文件涉嫌欺詐同偽造，仲即時報埋案。

小琴噚日就打畀身在深圳嘅鍾博士，可以話隔住電話都感受到佢嘅火氣，佢猛話唔介意畀中聚告，「我做乜要偽造文件？Ｘ佢老Ｘ，佢哋講乜Ｘ都得㗎啦！我阻唔到佢哋㗎，去到法庭咪睇吓邊個證據多啲囉！」

兩邊各不相讓，小琴心諗呢個環境，睇嚟中聚同鍾博士都係要法庭見先有個明確判決了。