【馮仁昭四圍超】陳秀雯拍ViuTV劇「感覺好」

【蘋果日報】現年56歲嘅陳秀雯自從08年拍完亞視劇集《法網群英》後，已經近十年冇拍港劇。馮仁昭噚日收到消息，ViuTV除咗搵鄭少秋同陶大宇拍《詭探前傳》，又搵鄧萃雯同陳錦鴻開一部講夫妻感情破裂嘅新劇之外，原來仲搵埋陳秀雯出山，開拍一部由電影《點五步》導演陳志發監製嘅青春校園劇，秀雯喺劇中會飾演校長一角，而《瑪嘉烈與大衛系列前度》嘅男主角劉俊謙就飾演老師。
故事有新意
陳秀雯噚日喺電話度話：「開咗兩日工啦。我見佢哋（ViuTV）冇做宣傳，以為佢哋唔做宣傳㖭。」問佢開工感覺點樣，佢就話：「感覺幾好，意料之外地好，初聽故事嗰時覺得佢故事幾interesting，聽完故事大綱之後就覺得幾有新意，同埋有挑戰性，所以咪拍囉。」
其實陳秀雯同鄧萃雯都好有緣，佢哋94年喺無綫合作過《再見亦是老婆》，96年又一齊幫亞視拍《再見艷陽天》，依家佢哋兩個一齊效力ViuTV，唔知將來有冇機會兩個喺ViuTV再合作拍劇呢？
撰文：馮仁昭