內地富豪 寧幫襯外資行

【明報專訊】內地銀行為咗配合內地富戶同胞「走出去」搵大錢嘅需要，幾間內銀都已經喺香港設立私人銀行分支，可惜「神女有心、襄王無夢」，全球管理諮詢公司麥肯錫一個調查就發現，內地富戶如果要喺國外搵私人銀行服務，八成都話要幫襯「老外」外資銀行，而唔係揀番同聲同氣嘅中資行。

包括工行（1398）、中行（3988）、建行（0939）、交行（3328）、中信行（0998）都已經透過香港分支，成立私人銀行服務，小琴聽好多中資私銀賓架話，設立目的就係跟住客戶走，好等有機會照顧埋同胞喺國外嘅資產。

不過小琴噚日同麥肯錫全球董事合伙人林國灃傾開，佢話國內同胞雖然喺大陸會用番中資行，但一離開本土就「崇洋」，160個內地富戶之中，八成話喺國外會揀國際銀行嘅私銀。林國灃話，始終中資私銀喺產品設計、服務質素上，同外資仲有一大截距離。而且小琴心諗，同胞都嚮往資本自由嘅外國社會，相信亦都係佢哋擺錢喺外資行嘅原因之一。

分行使用率下跌

麥肯錫調查亦發現，亞洲人愈嚟愈少用銀行分行，相比喺以往做嘅調查，網點分行使用量首次下跌，網上或手機銀行嘅使用量，則首次超越傳統分行同電話理財渠道。

林國灃建議，香港銀行亦大可考慮停止擴張分行，加大網上投資，相信可更服務到現今社會嘅用家。

報料電郵﹕piano@mingpao.com