美國土地 內地網拍

【明報專訊】內地樓市限購之下，資金苦無出路，各種投資產品被輪番炒起；另一邊廂，美國經濟毫無起色，樓市等人打救，於是近日有美國土地堂而皇之登陸內地，在網上放售。

1美元起拍 8800美元封頂

內地最大房地產網站搜房網將於7月初推出21塊美國土地。據主辦方回應，每塊土地佔地面積均有1萬呎左右，單塊地市價約5萬美元；全部地塊位於佛羅里達州李縣一大型居住區內，目前已居住400多戶，小區配套設施完善，河流環繞，距離海灘只係15分鐘路程；而21塊土地中，20塊為團購項目，起價1.9萬美元，折合呎價14.8港元；1塊用於拍賣，1美元起拍，8800美元封頂，折合呎價只係6.8港元！

對於呢個驚人低價，主辦方稱拍賣的地塊是開發商UsoFA「送給中國人民的禮物」，總體價格低則是由於開發商購入成本低。她又告知小琴，如果嫌地塊太細，可以等一等，好快會有大面積地塊推出。今後如果想要起別墅，搵當地Builder就可以，若要轉手出售，可以搵美國當地中介，或者通過搜房網。

小琴想起內地媒體一則報道，描述北京同埋上海的房價之高，稱如果賣掉北京，可以買起整個美國；如果連上海都賣埋，就可以將日英德法四國買起。咁究竟係中國富強，還是危機前兆？日本經濟衰退之前，最為人津津樂道就係，只要賣咗東京兩個區，就可以買起整個美國。