任總中大講書 似足蘋果教主

【明報專訊】金管局前總裁任志剛風采依然，噚日去中文大學全球經濟及金融研究所講座，主講「中國的貨幣及匯率政策」，吸引咗400幾人嚟聽書，迫爆課室。佢攞住部iPad 2講書，仲要破格地唔係坐定定，而係邊行邊講書。台上嘅任總似足推銷蘋果新產品的「蘋果教主」Steve Jobs，下次有科技產品要搵代言人，可以考慮吓搵任總。

任總噚日講嘅課題係「中國的貨幣及匯率政策」，佢開宗名義話自己好「Academic」（學術），好着重理論基礎，冇理論基礎嘅東西，塞錢入佢袋佢都唔會高興。

貼近民生 知粟米班塊價

收錢都唔高興？咁政府派6000蚊任總會點使呢？任總雖然離開香港官場，不過佢言語間仲用番官場慣常用語。佢稱呼在場嘅立法會議員陳茂波時，說到「尊貴嘅陳議員」。主持人笑住話任總留戀住議事堂嘅氣氛。任總仲好貼近民生，佢提到「粟米班塊飯，我知35蚊一盒嘛。」睇嚟任總咁熟民情，不妨考慮吓從政。

報料電郵﹕piano@mingpao.com