深圳電視「聲演」本報獨家

【明報專訊】本報日前報道一名28歲惠州少婦，獲老公送贈九龍站凱旋門頂層，價值3.45億元嘅情人節禮物。報道吸引內地好多網站轉載，連「今日惠州網」都有引述呢篇報道，豪宅女主人黎嘉敏一定紅爆家鄉。

模擬電話訪問 純粹聲演

小琴仲發現深圳衛視新聞節目都有足本報道呢隻故仔，其中一個畫面係電話訪問黎嘉敏。小琴都好有興趣聽吓女主人講乜，特別係呢篇報道出街後，佢嘅睇法會唔會有變。不過聽咗一陣，對白內容同報道一模一樣。睇真啲原來只係一個模擬電話訪問，即係電視台搵人聲演黎嘉敏，將報道內容重複講一次。

有網友好聰明，喺網站留言話，一聽到把女人聲抑揚頓挫，就知唔係當事人訪問。有內地網友睇完報道，感慨內地炒房團衝到香港，但無助內地房減價，仍然會有壓力。