胡文新「升級」替老豆開會

【明報專訊】合和實業（0054）、合和公路（0737）主席胡應湘飲得杯落，阿仔胡文新接手合和業務，逐漸上軌道。集團噚日發通告，胡文新「升級」獲委任為老豆胡應湘嘅替代董事，呢個位原本係由元老何炳章擔任。38歲嘅胡文新1999年加入合和，已經擔任集團董事總經理，經歷咁多年磨練，已經獨當一面。

胡應湘近年淡出，傳媒較少見到佢。胡文新經常主持公司重要項目，例如：重新發展灣仔喜帖街。而擾攘多年的灣仔合和中心2期發展，佢決斷大幅降低發展規模及親自向居民解釋疑慮，令政府「開綠燈」拍板通過。

員工讚推五天工作落力

小琴早排同合和員工傾過，佢哋大讚呢位年輕老闆有魄力，而且理解現今職場嘅管理技巧。佢哋話公司成功推行五天工作制，都係歸功胡文新。員工話老闆係新一代，明白工作同家庭生活要取得平衡，大力支持呢項措施。有啲啱啱大學畢業嘅學生亦話，應徵幾家公司都獲得聘請，最後揀咗合和，原因係呢間公司行五天工作制，多咗一日假期可以進修、休息之外，亦增加佢哋對公司歸屬感。

另外，電視廣播（0511）新加入嘅非執行董事、HTC創辦人王雪紅，就搵咗老公陳文琦做替任董事。陳文琦同樣喺手機、開發軟件表現出色，夫妻同心，要睇吓佢哋點樣領導無綫新發展。

報料電郵﹕piano@mingpao.com