新聞類別
財經
詳情#
【明報專訊】話說國家發改委早排為咗減少發展商賣樓時出「蠱惑」，5月1日起要求商品房「明碼實價」銷售，小琴噚日就見到發改委喺北京做嘅調查，結果似乎好嚴謹，皆因小部分有問題嘅樓盤，部分仲竟然係來自央企下屬嘅開發商喎。
違反「一套一標」規定
根據發改委嘅要求，內地樓盤喺5月1日起，要喺交易場所擺放明碼標價公示牌､價目表或者價格手冊，要做到「一套一標」，仲要標示埋間屋嘅建築面積、單價、優惠折扣同容積率等等，實行同香港賣樓派價單睇齊。
而發改委早排對北京30幾間發展商做嘅調查入面，發現大部分都有遵守規則，但幾間央企好似中國海外（0688）、中信集團同中鐵集團，旗下都有樓盤唔係好守規矩，好似中海外嘅「中海九號公館」就冇喺售樓處嘅當眼位置擺好價目表，中信嘅「中信禧園」冇一次過公開預售房源，全部要畀發改委懲罰。
內地近幾年炒樓風氣拍得住香港，有啲發展商仲鍾意走「法律罅」，搞到唔少新一代都大嘆買樓難，政府梗係要做番啲嘢，不過唔知香港政府幾時可以向「阿爺」學吓嘢呢？
留言 (0)
