朝鮮學生請富商食檸檬

【明報專訊】政府成立嘅「關愛基金」周圍搵富商捐錢，但唔多順利。梗係啦，啲富商係生意人，一分一毫用得其所，做慈善活動都一樣，佢哋都想將錢用喺自己支持嘅項目。小琴聽聞一位富商成立基金，主力捐助學生讀書，知識改變命運嘛，所以不論國籍、背景，只要肯勤奮讀書，佢都大力支持。

呢位富商近期贊助咗幾名朝鮮學生嚟香港讀大學，朝鮮係一個封閉國家，除咗領導人有少少自由出外遊埠，一般平民外遊都受限制。

朝鮮願意派學生嚟香港讀書，實在非常難得。因此，富商希望見見呢幾位學生，認識吓呢批受助人在港生活適唔適應。

朝鮮代表飯局中招商

富商約佢哋見面食餐飯，不過飯局當日，只有朝鮮嘅代表嚟到，學生就冇影。呢位朝鮮代表話唔方便帶班學生嚟見富商，令到呢位富商非常冇癮，後來朝鮮代表仲不斷游說富商投資朝鮮，富商都唔知點回應佢好。

富商想做善事，都要慎防被騙。有另一個真人真事嘅例子，就係港人捐錢資助內地興建學校。當地人當然歡迎，更將校名用富商名字冠名。不過，呢個學校牌匾「再循環」使用，當富商喺學校門口影完張「到此一遊」相片後，學校就會換個牌匾，改名畀另一個贊助商影相，所以有捐款機構監管人話，時不時會派人去學校望吓個牌匾，睇吓有冇改名。

報料電郵﹕piano@mingpao.com