港交所股東會 經紀踩場

【明報專訊】有「股壇長毛」之稱嘅獨立股評人David Webb咁出名，唔多唔少係因為佢經常去各大小上市公司嘅股東會「踩場」，向管理層提出辛辣嘅問題。噚日港交所（0388）開股東會，經常「鞭策」港交所嘅Webb冇出現，但兩名相信分別係華資經紀及大凌小股東，就秉承Webb嘅精神，把握難得機會向主席夏佳理同行政總裁李小加「發炮」！

經紀倡撤再縮午飯時間

話說有位小股東喺股東會開始不久，即向港交所高層表示，延長交易時段對提高成交量冇乜幫助，問港交所會唔會取消明年進一步縮短午飯時間嘅計劃。喺無數場合答過唔少經紀同一條問題嘅小加就重申，延長交易時段長遠可為港交所帶來好處。夏佳理亦幫口，話一早已講明延長交易時間，唔係純粹為增加成交量。

話口未完，另一位既係港交所小股東、亦係大凌集團（0211）小股東權益關注組秘書嘅趙澤民就「接力」，話近日有一名大凌小股東入稟控告港交所上市科總監簡嘉穎疏忽失職，並要求賠償，質問夏佳理點樣確保公司未來若牽涉金額龐大嘅訴訟，交易所股東毋須承受法律嘅風險和損失。

夏佳理就話，港交所盡量避免因為任何疏忽而損害到股東或第三者的利益，但係任何職員同董事都只係普通人，只能夠盡量防止問題發生。

趙澤民又問佢，點解港交所會出錢幫員工打官司，夏佳理解釋交易所有為員工買保險，範圍包括訴訟。趙澤民對於呢個答案就唔多滿意，批評港交所「答非所問」，仲話會組織遊行抗議喎！

報料電郵﹕piano@mingpao.com