【明報專訊】上訴庭副庭長胡國興，令市民印象更深刻的身分，相信是每次選舉開票箱，又或以截取通訊及監察事務專員身分狠批執法機構「唔聽話」的形象。自1992年加入司法機構後，胡國興出任的公職多不勝數：選管會、嘉利大廈調查小組、新機場調查委員會等，但身為「公職王」的他堅稱「I am not a government man（我不是政府的人）」，公職多全因自己「認叻」及「唔會托手踭」的性格。
多公職因認叻唔托手踭
明年66歲生日才正式退任上訴庭副庭長的胡國興，年初開始退休前休假，但仍身兼截聽專員，每天照樣上班。回歸前後近20年，當港府出現燙手山芋的議題，需要獨立及具威信人士拆彈時，胡國興便被委任，披上「救火隊隊長」戰衣。
「那次與太太度假，坐郵輪到波羅的海，竟然都收到衛星電話搵我做嘢。」他說有時連事件背景也不太清楚，那次正是前任首席法官李國能打來，叫他出任截聽專員。
胡官坐在截聽專員的辦公室，所用的是選管會的宣傳水杯。他說公事繁重全因「認叻」性格：「我就是蠢，40幾歲時最鍾意認叻，做大狀時明明多數做民事案，但1992年做法官後，刑事、司法覆核、刑事上訴乜都話識，卒之做咗百搭法官，乜都要審，其他人病咗放假就係我頂，結果乜都有我份。 」
「8年周末出得3次街」
胡官2000年當上上訴庭法官，加上每兩年輪流出現的立會及區會選舉的選管會主席職務，以及其他公職，他的生活只有工作。「做上訴庭法官那8年，周末真真正正出街只得3次」，大部分周末，胡官都與10個大文件夾為伍，周六看文件至凌晨2時，周日再由午間看到深夜，為下周案件備案，希望開審前先做臨時判辭，連他亦承認判辭沒可能做到細緻。他形容法官工作有趣，但工作量很大，只是他不抱怨言：「有咪做囉，又唔會做死嘅，if you are tough enough, you won't break down（如果你夠硬淨，你不會倒下）。」
查嘉利大火橫跨回歸前後
胡國興自言最能見證回歸前後順利過渡。1996年嘉利大廈大火，末代港督彭定康下令調查，1997年中交中期報告給彭定康，同年底換了交正式報告給首任特首董建華；後來調查新機場開幕混亂事故，董建華再委任他，「（回歸前後）完全無變，一啲嘢都無變，只係唔同咗主人」。
胡官現時專注截聽專員一職，會否「太空虛」？他立即再次展示其能屈能伸的性格反問記者：「無嘢做好悶咩？無嘢做唔係好好咩？我唔介意做嘢，但我唔係工作狂，只要做時畀心機，唔好『詐詐諦諦』就得。我無嘢做可以瞓覺、睇電視或者行街食飯，有乜所謂？」
明報記者 陳穎鏇 謝美琳
