四叔：恒基要賣多啲樓

【明報專訊】四叔李兆基深明重賞之下，必有勇夫嘅道理，每年都會親召龍頭代理行嘅頭頭，頒發恒基金牌，鼓勵一下銷售恒地（0012）樓盤表現優秀嘅代理。有出席領金牌嘅代理透露，四叔於會上表示今、明兩年會賣多啲樓咁話。

新地（0016）、長實（0001）、恒地，三者差唔多咁高咁大，但恒地喺2009、2010年賣樓明顯較少，以上年為例，無論銷售量及金額，都係前兩者一半都唔到。

恒地賣樓主帥林達民早前話，今年計劃喺香港推出8個全新商住盤外，神州內地多個二線城市可供發售嘅單位，更加超過1萬個，若恒地今年在中港兩地嘅賣樓銷售總額，有機會達200億元。

今年港料推7盤 件件重手貨

可留意嘅係，恒地部署今年在港推出7個全新樓盤，數量其實不算太多，但上環尚賢居、灣仔金國中心重建項目、九龍麗東酒店重建項目（太子道和界限街交界）、粉嶺馬會道項目。不過，小琴心想，七盤均屬市區貴價分層豪宅或洋房物業，件件都係重手貨，以現時市况，成交價隨時可創同區新高。

昨日嘅頒獎禮中，中原地產獲得2010年「恒基全年銷售總金額冠軍」，中原表示，年內促成恒基旗下淺水灣赫蘭道赫蘭道11號交易，金額達6.6億元，為本港歷來最貴成交嘅單一洋房，簡單講即係銷售額最高。而其對手美聯則出稿，指去年成為銷售「恒地樓盤成交量最多」嘅代理，並由主席黃建業帶領近20名主管從四叔手上接過金牌。小琴一諗，咁即係，中原幫四叔賣到大額貨，美聯就幫到四叔去到量。

報料電郵﹕piano@mingpao.com