【魚樂無窮】第一桶金的定義

【蘋果日報】

外遊關係，繼續吹水冇冧巴。又講番早前《理財急Call》節目，主題是「如何賺第一桶金」。還記得專家們咪後討論時，對「第一桶金」的定義已有分歧，上網搵答案，發現普遍說法都以100萬元為界線，即賺到一球錢就等於搵到第一桶金。


世上事情都是相對的，做快餐店搵最低工資的，搵100萬可謂天方夜譚，但對於專業人士來說，打工儲夠100萬快過打針。貼地啲睇，普羅打工仔單靠人工，然後做到有100萬cash揸手，其實一啲都唔易，所以我經常對不諳財經金融的朋友講，無論如何，點都要做些投資，為資產增值。最安全而入場門檻最低的，莫過於月供穩陣的高息股票。月供之外，還有一個方法，我將於下星期六的講座和大家分享，有興趣的戰友，請到本欄fb專頁報名。


又講番第一桶金的定義，究竟100萬係咪等於一桶金？如果用歷久不衰的話題──樓價來衡量，100萬距離畀首期上車之路仍遠，絕對談不上係黃金。用來搞生意嘛，舖租已經食咗你一大截（網店另計），100萬只能當落part。所以，虛無飄渺的結論係，能夠實現你的夢想，但又唔影響日常生活的，就是你的第一桶金！


唐牛

http://fb.com/tongcow88

本欄逢周二、四刊出