【娛樂人物】42歲康子妮　星媽在望

【蘋果日報】42歲的康子妮於06年嫁給林曉峰，27歲就做媽媽，兩年生下兩個兒子，坦言當時年輕的她有點迷惘。她的15歲大仔林寶去年有公司邀請試鏡，她笑言：「我都力捧唔到我自己，但佢話想，我同老公一定幫。」


撰文：嵐山

攝影：陳俊強

康子妮近日「出山」，孖住老公林曉峰一齊主持ViuTV真人騷節目《愛我嗎？愛你媽！》，是關於兒子、奶奶與媳婦的倫理關係。她於06年嫁給林曉峰，27歲做媽媽，兩年抱兩，如今大仔林寶15歲，細仔林熙14歲，已經各自有女朋友，她坦言有點失落感：「有段時間會，尤其星期六夜晚食飯，一個去拍拖，一個跟同學開party，老公又有自己節目，得我一個食飯。」提到年紀輕輕已經做媽媽，她坦言當初有迷惘：「我嗰時個age，身邊冇朋友咁快生小朋友，冇人同我傾，好多中學同學依家先生BB，我嗰啲已經大人咁。」兩名兒子相差一年，她媽媽都擔心女兒有金錢煩惱，她說：「成日有啦，所有artist都有，都唔會後悔，能夠組織一個家庭係開心嘅，不過冇諗住咁快唔做嘢，好多取捨係我冇預期。」


屋企幫助買樓

由於康子妮負責湊仔，搵錢重擔落在林曉峰身上，三年前才能成功「上車」，部份首期更是由她父母幫忙，她解釋：「依家買樓好難，冇能力就係冇能力，冇得夾硬，我哋亦錯過好多上車機會。但我父母好好，永遠都好就我，我屋企人唔係話：『你睇，又要我哋幫你。』而係想一齊合力做一件事，計過數，唔係好辛苦先實行。」兩個兒子漸大，康子妮就重拾興趣做音樂。她16歲已考獲鋼琴演奏級，大學在多倫多讀音樂，近年為鄭伊健和歲月友情系列巡迴演唱會御用樂手兼和音，逢周末出埠工作，同時兼顧照顧兩個仔。


大仔非讀書料

對於兒子，康子妮自言不想做虎媽，大仔去年有公司邀請試鏡，她說：「佢唔係讀書材料，佢自己都知，今年讀國際學校Year 10，成日有人話佢高大，幾好樣，我都有問過哥哥有冇興趣做artist，佢用低沉語氣話『好吖！』佢份人就係咁隨意。反而細佬好鍾意結他、玩啤牌，一早講咗唔想入行，知自己唔係娛樂圈嘅材料。」問到會否幫大仔進軍娛樂圈，她笑言：「我都力捧唔到我自己，但佢話想，我同老公一定幫。」問到會否再生？她決絕謂：「我收晒工啦，一定唔會，細路都咁大個，依家冇呢啲精力，反而幾享受自己做嘢。」


提到在真人騷中，研討兒子、奶奶與媳婦的倫理關係，現實中與奶奶關係？康子妮好識賣口乖：「我奶奶OK㗎，佢係好識做嘅老人家，唔會囉嗦，凡事適可而止。」


髮型：John Chung of Barbieri Privata

大仔有伴

康子妮老公林曉峰與家姐林珊珊和哥哥林海峰都是演藝中人，而他們的演藝路也由下一代延續，林珊珊的大女李澄早已以DJ身份入行，在ViuTV任主持，另外舅父狄龍的兒子譚俊彥也於00年入行，演出電影包括《慌心假期》、《男人四十》、《少年阿虎》，16年簽約無綫，故康子妮大仔入行的話，不妨組家族班底。