惡法睇真啲：特首是「妹仔」法庭無「鎖匙」

【蘋果日報】問：政府聲稱移交安排由特首啟動、法院判定，具雙重把關功效，現有安排下，兩個所謂關卡真正可以保障香港人權？

相關新聞：律政司：「黃雀行動」窩藏逃犯非刑事罪

資深大律師　梁家傑：

特首係妹仔嚟嘅、香港係特區嚟嘅，升起緊五星紅旗嘅，所以你話要靠特首把關呢，就真係廢話，依個（修訂）同兩個主權國之間，咁高咁大下去定一個引渡協議，係兩碼子事啦。


至於你話法官把關，你叫我同你看住個門口，但你鎖匙都唔畀我，咁我點同你看門口呢？我哋啲議員咪叫佢（港府）將《國際人權公約》所規定嘅人權保障，作為一個法庭拒絕引渡嘅理由，如果你肯白紙黑字，肯喺《逃犯條例》寫明，法庭可以用「申請引渡國不能提供《國際人權公約》規定嘅人權同程序保障」作為理由唔送中呢，我就覺得你係畀咗法庭一個把關嘅鎖匙喇。


《基本法》22條白紙黑字（禁止中央人員干預香港內部事務），依家咪又係（中聯辦主任）王志民操盤、指揮若定，亦都睇到《中英聯合聲明》佢（中國外交部）兩三年前已經話無咗、係歷史文件，（所以）邊有人信你（中央政府），寫一套做一套；我都好服李家超，可以面不紅耳不赤將中共寫嘅條文照本宣科咁讀。