「買樓比買菜兒戲」中學阿sir花15秒　豪斥960萬入市

【蘋果日報】【周末專題】如果買樓不是買棵菜，那麼中學教師袁sir覺得買樓比買菜兒戲。榮升荃灣全．城滙業主的袁sir，作為首置客已做足功課，邊個單位供幾錢都計清楚，最終受不住現場熾熱氣氛，僅花15秒以約960萬元買入一個高層兩房單位，簽約後幾日忐忑不安。
記者：陳家雄
學者認為，發展商提供高成數按揭透明度不足，建議檢討相關冷靜期，殺定金額由樓價5%降至1%。
袁sir和太太都是教師，外人看似薪高糧準樂無憂，但各自負擔重，「我哋本身同家人住，畀好多家用，所以好難儲錢。加上現在有兩個小朋友，使費多」。要不是外母肯把早年低價買入物業加按套現，百萬首期也沒有。
買全．城滙兩房戶
袁sir想買荃灣全．城滙，希望住近媽媽互相照顧。雖然全．城滙發展商華懋口碑欠佳，但今次講明用名牌建築商。全．城滙當年收票多達2.25萬張，亦成為97後新盤票王。袁sir抽到第2輪，朝早8點排隊，排幾小時入售樓處，「入到售樓處，先係真正壓力嘅開始，因為見到螢光幕，單位不斷咁無咗。死啦！算啦！放棄啦！不過經紀話：『埋到去無先算！』咁咪繼續等囉！」
「我哋700幾號籌，揀樓時嘅氣氛令你有啲壓力，想揀呢間，隔籬嗰人又揀咗。平啲嘅單位已經無啦喎，氣氛令你不自覺地未睇預算已經扑槌！簽臨約後幾日都好忐忑，究竟係唔係一個錯嘅決定呢？反覆用電腦計，會唔會計錯供款……原本預算月供最多2.5萬元，現在大概3萬元，暫時來講都可以負擔。初頭預算700零萬㗎咋，但被人揀晒！」
自認做足功課，邊個單位供幾多錢都列表，同期有其他新樓，但他稱：「個刻無諗到嘅，經紀問我：『喂你揀唔揀？唔揀就佢要啦喎！」，只不過早人哋兩個籌號。當其時嘅氣氛令你覺得『唔揀真係無』，覺得令你做錯誤決定。揀樓兒戲過街市買棵菜，棵菜都可以拎上手睇靚唔靚，層樓只係望吓價錢，望吓表，就扑槌買！決定買呢個單位，我諗係10至15秒。」
首次置業以960萬元買入一個高層兩房單位，「心頭高？負擔太重？係呀。其實我有諗過，簽約時都震晒，諗之後負擔係點樣呢！好彩係份工尚算穩定，若我做其他行業，收入唔穩定，可能唔玩呢個遊戲，可能出去租樓，或者繼續同屋企人住。」袁sir覺得應要有兩星期冷靜期，讓買家向銀行做預批按揭，「如果唔係，呢樣嘢（賣樓方式）可以害死好多人。」
學者倡降殺定金額
目前新樓冷靜期5天、殺定為樓價5%，中大經濟學系副教授莊太量表示足夠，指作為一個成年人買樓需負責任。但近年發展商推出高成數按揭透明度低，如果買家基於不完全正確資訊情況下作出決定，發展商都要負責任，針對這類按揭，建議殺定降至樓價1%。
長青網 - 一站式長者及護老者生活資訊網站