佔中標誌設計師：好人冇好報

【蘋果日報】為保持創作上的靈活性和獨立性，政治漫畫家黃照達一直與政黨政團保持適當距離，直至2013年「破例」為和平佔中運動設計標誌。黃照達設計時特別擺脫過往強調「抗爭」和「力量」，以中空圓形配上站在圓形之上的小雀構圖，寓意港人如小雀般以微小但和平的力量進行佔領，「好似喺燈柱、喺棵樹嗰度，有隻雀仔企喺度，就已經佔領咗」，而以和平手法爭民主的佔中三子卻或因此失去自由，黃認為三子最大罪名是為港人散播希望，感恩三子付出之時，「你睇到嗰種失望：好人原來冇好報」。
「幽默感力量可以好大」
現為浸大視覺藝術學院講師的黃照達2013年在朋友邀請下，為當時不認識的佔中三子設計運動標誌，他稱希望透過標誌，令港人思考甚麼才是心中最重要的價值，「個圓形其實就係個心，你個心裏面其實俾乜嘢佔領咗？」
一如標誌寓意只以和平手段爭取民主的三子，最終公眾妨擾罪成而有牢獄之災，黃坦言很不開心，指佔中運動一如當年設計的圓形中空標誌，「成件事好似一個問號，冇畀到一個答案你，中間就好似問緊每個（香港）人，你依家覺得乜嘢係最重要？」
事隔六年，他又覺得港人現時心中存在甚麼？黃稱難答，認為與佔中運動高峯期相比，不少港人因為感到疲倦，回歸至追求個人生活價值，事實上他亦認為政治與個人生活取得平衡十分重要，「要喺個人生活有啲修行，先可以支持到（自己）繼續喺社會上做嘢」。
問到會否擔心因此創作被秋後算賬？黃坦言擔心較2013年時大，「因為《逃犯條例》、23條（立法）、全部都係衝住言論自由而來」，但他明言無悔，「因為我覺得呢樣係應該做，當時係想做一件作品感動人同拋個問題出嚟，呢樣嘢至今仍然重要，我亦好鍾意呢個作品」。
令黃照達拒做「順民」的正是漫畫，發表畫作至今12年，「我唔敢講我自己可以代表啲乜嘢，但我哋（政治漫畫家）嘅存在，亦都係一個指標，究竟呢個社會仲係咪容納到一啲批判嘅聲音？」他指面對威權政府，港人的幽默感可能是最佳武器，「我用暴力去對抗，你（政府）可以用更大嘅暴力對付我；如果我用道理去講，你可以用歪理去對付我；但當我笑你嗰陣，你冇得對付我。即係我笑你嗰陣，如果你仲喺度扮嘢，出醜嘅係你自己，所以幽默感個力量其實可以好大」。
黃照達強調，未來會續在專欄及網絡發表政治漫畫，珍惜香港僅存的表達空間。
■記者林俊謙
長青網 - 一站式長者及護老者生活資訊網站