林榮基：內地法庭毋須講證據

【蘋果日報】曾因出版禁書而被內地拘留的銅鑼灣書店前店長林榮基預告修例通過前或離開香港，他昨日亦有參與遊行，強調就算政府剔除部份可移交罪行「都冇用」，關鍵始終是大陸毫無法治可言，警告港人若「唔出聲」，形同將自己置於毫無保障的境地，不能相信特區政府任何承諾。
「政府保障唔到下一代」
林榮基昨指出，「大家都知道，大陸係冇法治可言，我自己都經歷過，可以困咗我八個月，（其間）我未見過法官，咁你甚至（要）拍好多所謂（認罪）視頻呢，我都拍過成七、八次。佢（內地）所謂認罪，可以係唔需要法庭或者證據，佢話你係就係」。對於保安局局長李家超至今未正面回應修例後會否引渡他返回內地，林直指，「李家超佢打工㗎之嘛，打工嘅點可能代老闆話事？甚至依家香港特首都係打工之嘛，我哋點信得過佢啲承諾？佢應承咗香港人有選舉權，依家有冇？」
林榮基重申，修例不僅影響他一人，至少自己知道被大陸以「違法經營書籍銷售罪」通緝，假若有港人不知道自己被內地通緝，外遊時突然因今次修例被告之不能出境，人身自由將嚴重被影響，強調修例影響下一代的人身自由，「相當多嘅香港人仲留喺（香港）呢度生活，咁下一代點算？依家啲學生點？你香港政府係保障唔到」，斥大陸政府近年對港管治越來越嚴厲，香港原有生活、言論和思想自由已不斷被剝奪和侵蝕。
林稱仍在思考修例後可到何處生活，目前選擇地方包括美國和德國，另一考慮地點暫時不便透露，坦言「呢個（修例）係對我冇保障，我點可以仲喺香港生活？」
■記者林俊謙
長青網 - 一站式長者及護老者生活資訊網站