中環在線：平過出面　優品360：金莎好賣得

【蘋果日報】禮盒最賣得嘅時間就係農曆新年，不過，本地休閒食品零售商優品360（2360）行政總裁許志群話，公司有一款禮盒，一年四季都好賣得，完全唔急於散貨，嗰款就係咁多年港人百食不厭嘅金莎朱古力。
金莎周圍都有得賣，點解優品360嘅金莎好似特別賣得？因為一個「錢」字。許志群話，優品啲金莎長踞銷售榜首嘅原因之一，係因為售價遠低於各大超市，一盒平出面十幾二十蚊；如果超市冇做特價，價差可以去到20至30蚊！
其實現時賣食品嘅競爭咁大，行家們永遠都離唔開鬥平嘅漩渦，許志群話，每間公司嘅個別產品都會有來貨價優勢，公司除咗金莎，堅果及果乾類食品都有較低採購價，公司可以長期賣得平啲，目前30粒裝金莎售價59元，稍後會試試賣61蚊。加價？市民好反感㗎喎！許笑笑口話：「加兩蚊後都仲係比出面平」。
李華華 LiWaWa@AppleDaily.com
長青網 - 一站式長者及護老者生活資訊網站