中環在線：保險協會投訴TVB劇有誤解

【蘋果日報】TVB（511）以保險為題材嘅劇集《守護神之保險調查》雖然播完，不過仍然收到唔少投訴，繼早前遭香港紓緩醫學學會話情節錯誤後，連香港人壽保險從業員協會（保協）都批評佢哋對保險有誤解。
保協話，劇集1月9日片尾提出一啲保險小知識，話一個投保人後生時買保險，嗰時冇食煙，但之後染上食煙習慣，後來仲染上肺癌，大台就話佢冇同保險公司申報之後有食煙，所以可以拒絕賠償㗎。
保協就話呢件事唔正確，主要保險公司都唔需要投保人就之後嘅吸煙情況申報，亦唔會因為咁拒絕索償。
咁大台點答保協呢？就話相關資料「本台已轉呈製片方參考」，仲話保險小知識環節已經諮詢過保險業人士，觀眾有疑問應該搵保險顧問查詢。咁其實即係冇答過嘢啦，華華建議觀眾切勿輕信大台劇集資訊，有事應該搵專業人士諮詢。
李華華
LiWaWa@AppleDaily.com
長青網 - 一站式長者及護老者生活資訊網站