中環在線：嘉藝記招　女公關做「伴娘」

【蘋果日報】唔少內衣股、服裝股上市，喺記者招待會都會請model着上公司嘅產品，等大家親眼睇下公司產品外，又為現場增添樂趣。本港首隻「婚紗股」、婚紗及伴娘裙製造商嘉藝控股（1025） 亦唔例外，噚日記者會上，就搵嚟兩位model着上自家製嘅婚紗及伴娘裙繞場一周，不過公司生產嘅裙款有過百款，兩位model又點夠呢，於是由主持人到接待處，成班靚女公關化身model，齊齊換上伴娘裙，最後仲同主席莊碩影大合照。
接待處送朱古力玫瑰「回禮」
適逢噚日情人節，接待處仲有兩位「伴娘」向在場人士每人送上一枝朱古力玫瑰花，華華有一刻以為自己去咗參加婚禮吖。如此認真，公關真係敬業樂業！
猶記得，幾年前有間胸圍股上市開記招，又係同一間公關公司負責，嗰次就冇搵自己公關親身上陣，但搵嚟兩位高佻model着上內衣影下相，令現場熱血沸騰，真係不得不服公關有諗頭。
李華華
LiWaWa@AppleDaily.com
長青網 - 一站式長者及護老者生活資訊網站