中環在線：耀才員工淡市過肥年

【蘋果日報】中美貿易談判耐唔耐就有新update，最新就講緊國務院副總理劉鶴計劃今個月尾（30至31日），飛去美國同貿易代表萊特希澤等美國官員會晤，突然傳出已經取消嘅消息。
雖然誰是誰非，現階段無人知曉，不過中美局勢演變嘅速度，真係要學羅家英講返句「好難觸摸呀！」難怪華華同股佬或者分析師老友，講開今年個市點睇嘅時候，大家都耍手兼擰頭，一句「政治市」已經end topic。倒不如好似耀才（1428）老闆葉茂林嘅預測，「要睇特朗普玩唔玩嘢，唔玩！恒指有望重上3萬點；玩！咁就跌返落22000點啦。」簡簡單單，講到尾都係「一男子」因素。
Anyway，舊年個市表現唔好，大家都唉唉聲，但係無阻耀才豪派花紅畀全體員工，最卓越表現員工就有超過15個月糧嘅豐厚花紅，可以淡市中「過肥年」。
李華華
LiWaWa@AppleDaily.com