中環在線：陳德霖豁出去　化身大嘥鬼

【蘋果日報】向來好錫身嘅金管局總裁陳德霖，今次豁出去做一件事，唔係要去保衞聯滙乜乜乜，而係扮黃錦星嘅囝囝大嘥鬼，鼓勵市民用多啲用過但仍新淨嘅銀紙（迎新鈔）嚟封利是，搏到咁盡唔知係咪想更加貼地氣呢？
金管局噚日upload咗一條片，一開始就見到一男子喺IFC 2期天台攞住一喼銀紙，疑似想撒啲舊銀紙落樓，殊不知大嘥鬼喺呢個時候就殺出嚟制止，用騎呢聲線同佢講用「迎新鈔」包利是一樣掂。
機靈嘅觀眾應該都feel到有啲唔妥，平時大嘥鬼最多叫人唔好浪費食物，點會叫人唔好嘥銀紙呢？
呢個時候陳德霖就喺大嘥鬼背後現真身，笑騎騎話「其實我係陳德霖」，成件事同平時皺晒眉去講嚴肅話題嘅佢分別頗大。華華聽講，大嘥鬼聲線原來真係來自陳德霖把聲變聲而成，而對白都係由佢親手執過，唔知佢第時唔做金管局總裁，有冇興趣做聲優或者編劇呢？
李華華
LiWaWa@AppleDaily.com
長青網 - 一站式長者及護老者生活資訊網站