陳啟宗憂港成貿戰祭旗對象

【蘋果日報】律政司決定不告前特首梁振英個多月來，梁及其「梁粉」一直低調。被視為「梁粉」、梁幕後「金主」的明天更好基金信託人陳啟宗（圖）亦拒多談放生梁一事，又形容事件只是「茶杯裏嘅嘢」；對於中美貿易戰，陳更揚言「中國我認為未必輸㗎」，但擔心香港會成為祭旗對象。
指UGL案「茶杯裏嘅嘢」
陳啟宗昨日與傳媒茶敍時被問到律政司不告梁振英一事，他聞言後即表示「我唔睇香港報紙喎、淨係睇吓啲世界新聞」，再被追問時就形容事情是「茶杯裏嘅嘢，唔係好大件事啫」。
陳啟宗亦被問到有否與梁振英談論過再選特首一事，然而他推說「我唔注意香港事嘅」。
另外，陳啟宗致辭時稱，社會不能對貿易戰掉以輕心，擔心當美國對中國有負面看法時，香港會成為被祭旗的對象。不過他亦覺得毋須過份悲觀，相信事情有很大可能解決，主要視乎美國總統特朗普是否有「內部政治需要」；又指貿易戰中沒有贏家、只有輸家，「你問我大輸家係邊個呢？我話大輸家就係美國」。他覺得中國可能在關稅問題上讓步，但非關稅問題上「一有（爭取空間），佢（中國）攞得就攞」，加上兩國互相需要對方，在中國至今表現非常理性下，只要美國不過份「戇居」就不會有事。
陳啟宗稱「表面上美國佬就風光，其實係特朗普風光，背後好多政治交易、金融交易係你同我唔可能知……所以講到底中國我認為未必輸㗎，玩吓手中國贏都未定」。
■記者呂浩然
長青網 - 一站式長者及護老者生活資訊網站