中環在線：周大福基哥孖CFO製作湯圓

【蘋果日報】 臨近農曆新年，周大福（1929）「總指揮」、集團董事總經理黃紹基（基哥）同財務董事鄭炳熙（Hamilton），噚日就同一班傳媒朋友整湯圓應下節！基哥同Hamilton平日咁忙，應該都好少下廚，今次整湯圓兩位都好畀心機，製成品賣相相當唔錯！近月金舖股生意麻麻，剛過去嘅聖誕節無助催谷銷情，原來，內地唔鼓勵慶祝西方節日，購物氣氛自然冇香港咁熾熱。
周大福早前公佈咗嚿年10月至12月嘅營運數據，中港內地同店銷售倒退，基哥話係意料之內，貿易戰事態發展唔明朗，時好時壞冇得估，加上人民幣貶值，對消費氣氛有啲影響。
國策拖累聖誕銷情
仲有一個原因呢，就係中國近年唔鼓勵慶祝西方節日，好多商場唔會主動promote（宣傳）聖誕，反而新年、七夕、元宵呢啲中國節日，金舖生意就會旺過平時。
李華華
LiWaWa@AppleDaily.com
長青網 - 一站式長者及護老者生活資訊網站