中環在線：「小愛同學」玩謝雷軍

【蘋果日報】噚日小米（1810）宣佈同宜家達成合作協議，仲話嚟緊會研究喺多方面合作，小米當然食住個勢宣傳佢個音箱喇。音箱功能類似蘋果Siri，講句嘢落order控制家電，每次呼喚就要叫「小愛同學」，有網民話個名都幾肉麻。
不過，當雷軍喺台上呼喚「小愛同學」時，「同學」竟然答非所問，雷總叫同學估謎語「三個木即是？」，同學竟然答「木三分」，再問多次竟然答台灣女子組合S.H.E.首《Super Star》歌詞，引起台下觀眾爆笑。之後雷軍再叫同學計加數，佢直情唔出聲，雷軍唯有打圓場話「你是不是每次演示的時候都要出錯？」場面尷尬。場外都有放幾部音箱畀在場記者試玩，發現唔少都係聲都唔聲下。
李華華
LiWaWa@AppleDaily.com