外賣平台Plum　大屠殺炒百人創辦者：入得Startup預咗

【蘋果日報】擁十萬用戶的外賣平台Plum傳出大裁員，涉及約百名員工，幾乎所有員工「冇得留低」，只保留一至兩名全職員工，受影響員工更不獲任何賠償，只接獲一個月通知。Plum承認大裁員，聯合創辦人張漢樑表示「Day 1入得嚟Startup，都預咗有呢個風險」。有前線員工直指老闆管理不善，導致今時今日的局面。
記者：倪敏慧　黃碧基
Plum昨日傳出大裁員消息，有前線員工向記者指，「之前炒完差唔多50個，同事士氣已經好差，冇諗過咁快又嚟，仲要一次過炒晒，冇錢賠只係得一個月通知期」。該員工直指老闆、主要創辦人兼CEO鍾永良管理不善，「不如直接執咗佢仲好」。
Plum擁10萬用戶，與600間餐廳合作，業務遍全港14個地區，現時有近70個取飯點、高峰時每日定單接近萬個，更已打入新加坡市場。昨日記者所見，Plum的員工仍如常於中環開設攤檔派飯。
倘無糧出　 「免費畀飯食」
聯合創辦人張漢樑早前接受本報訪問時表示，公司定單數量本來火箭式上升，但至今年8、9月停止增長，迫使公司重組削支，9月大手裁員。他當時指公司早期用人手處理大量工序，又聘請大量推廣人員，本來希望職位自然流失，但公司增長放慢，不得已要派大信封。
據了解，成立不足一年的Plum員工數目高峯時超過200人，對初創公司來說十分罕見，9月第一輪裁近50人後，今次裁員更接近一個不留，剩餘十人轉為「聯合創辦人」，之後亦未必有糧出，員工無奈說，「同事問冇糧出咁點，佢（管理層）話可以免費畀我哋食飯」。
有前線員工指，消息傳出後職員都不知道何去何從，隨後才收到終止合約的電郵，「唔係賠錢即走，仲要做多一個月，依家士氣咁你話點做？」該員工又指公司政策朝令夕改，「上星期美孚晚餐開咗一星期唔夠就閂咗，又閂咗沙田同將軍澳，我都唔知聽日會剩番幾多區」。
合作餐廳：間公司九唔搭八
張漢樑接受本報查詢時承認公司裁走全部約百名全職員工，包括其本人。他表示今次裁員目的是希望公司能繼續營運，現時仍聘用多名兼職，業務可以維持正常。對於被裁員工，他表示「Day 1入得嚟Startup，都預咗有呢個風險」，所有員工可以轉為「聯合創辦人」，但不再有固定月薪，改為攤分盈利。
Plum官方網站列出多家合作餐廳商戶名單，其中一家名單中的餐廳負責人向本報記者表示，數月前已停止與Plum合作，「我淨係知間公司九唔搭八」，因為「（生意）做得太少」，耗用很多人力和物力，根本賺不到錢。