馮檢基聞「鎅票」怒呼Shut up

【蘋果日報】【九西補選】
【蘋果日報】當選機會渺茫、卻又左右選情的候選人馮檢基，昨日以「老巢」深水埗為起點，穿梭不同酒樓拉票。面對鎅票指控，他說自己有八成票源來自支持者，即使李卓人落選，亦不需負上責任，「箍唔到自己嘅票唔好賴人」，又反駁「係咪李卓人嘅票就係李卓人，馮檢基嘅票都要係李卓人，咁先唔叫做鎅票？」
記者：李雨夢　黃翠儀
候選人馮檢基昨晨6時半起在「老巢」深水埗拉開最後一天拉票活動序幕，稱星期日長者和家人會到酒樓飲茶，故拉票日行程主要會到不同酒樓穿梭，他早上便到石硤尾酒樓向與長者為主的選民拉票。
馮檢基是次參選背負鎅票指控，他昨仍重申自己沒有「鎅票」，引述港大民調指他票源有分別11%和9.2%來自上次九龍西補選參選人姚松炎和鄭泳舜的支持者，「兩邊都有大約一成票流入我度，證明馮檢基冇鎅票」，指自己有八成票源來自支持者。
「係咪我嘅票都要係李卓人？」
倘李卓人因非建制派支持者票源被分薄而敗選，馮檢基認為自己不用為此負上責任，「如果箍唔到自己嘅票唔好賴人，我都拎咗陳凱欣10%嘅票」。他又批評民主派元老級人物指「票投馮檢基等於幫助陳凱欣」說法不當，指每個選民均有自由意志選擇其屬意的候選人，又指建制派及非建制派的欽點及協商機制反民主，「係咪李卓人嘅票就係李卓人，馮檢基嘅票都要係李卓人，咁先唔叫做鎅票？」
傍晚時分，馮再被追問與李卓人分薄票源問題，馮即強調「唔可以再話我同邊個分票，呢個係違反民主嘅」。他強調要相信選民，並一度激動說：「Shut up（閉嘴）！點解連元老級民主派都可以講啲咁嘅嘢？全世界邊有人輸咗之後賴另一個對手？」他指包括自己在內的人亦要反省為何香港民主如此落後。
自覺令選民有更多選擇
對於昨日下午投票率一度些微領先上次補選，馮檢基認為自己參選令選民有更多選擇，「年輕人可以唔需要再含淚投票、或者含淚不投票，佢哋可以投馮檢基」。
民調顯示其選情落後另外兩位對手李卓人和陳凱欣，被問到會否打「告急牌」，馮檢基指選舉時打告急牌已「告急告到濫晒」，稱「最重要係選民對你嘅選情緊張，自己急都急唔來」。他認為每個候選人均有勝算，自己是「可勝但有危險」。
對於與陳凱欣「共享」助選團，馮檢基稱涉事助選人員是為了避開陳凱欣助選團而坐了在陳凱欣直幡下，強調不容許助選團幫助陳凱欣助選，「唔可以憑張相同片就當係證據」。