屋苑故事：回憶無價　不談升跌住開一城有感情

【蘋果日報】樓市吹淡風，作為指標屋苑的沙田第一城，昨再有兩房減價100萬元沽貨，呎價險守1.5萬元。藍籌屋苑亦出現劈價潮，記者到屋苑直擊地產代理劈價實況，但對同區街坊來說，不談樓價升跌，對屋苑感情不變，甚至靜待機會幫下一代上車或買多間收租。
記者：王者馨　李海澄
記者以顧客身份到沙田第一城睇樓，先向美聯查詢細價樓盤，預算約500萬元。代理隨即表示有約10個樓盤可睇，並指「依家賣樓節奏快，可能今日傾緊，夜晚已經賣咗」。代理先帶記者看其中3個位於4期及5期的低層筍盤，其中最低價為485萬元的304方呎單位。
參觀樓盤期間，代理落足嘴頭，表示現時樓市「倒轉」，「以前業主臨門一腳可能要加20萬先肯賣，但依家反而可以減幾萬」。
區內代理落重藥撈客
記者隨後向中原查詢細價樓最平價位時，代理開口即說：「買家議價空間大，可以再傾。」參觀兩個樓盤同樣位於4及5期，最平為480萬元的284方呎高層。「2、300呎細單位，以第一城最好，間隔實用」，代理推介單位之餘，亦旁敲側擊提議放租，並指成交後，放租價錢可達1.3萬元。參觀期間代理亦多次強調，不會帶顧客參觀凶宅及低層單位。
接着來到利嘉閣，地產代理即推介公司「獨家盤」，並指是私樓中較合理的價格，「呢個呎價等於大圍居屋」，出盡力留客，利嘉閣旗下最平細價盤為495萬元的304方呎單位。
作為新界區藍籌屋苑，沙田第一城的樓價升跌皆吸引上車客眼球，同區街坊對屋苑亦充滿感情。街坊王太結婚時，見沙田區發展不俗，決定由市區搬進沙田第一城單位，一住30年，更在這裏組織家庭。王太回憶說：「我結婚生仔都喺第一城，仔女都大，依家做鄰居嘅保姆湊細路。依家屋苑變化好大，特別係樓價，我結婚嗰陣上車，用20幾萬買一個兩房高層自住，單位唔賣，會留嚟養老，做祖屋算喇。」
「30年嚟沙田第一城都有大變化，特別係商場同街市，已經全面翻新，商戶係連鎖店為主。街市就好現代化，全部有冷氣。不過，以往喺中秋、新年嗰陣，商場都有攤位遊戲，又有好多活動好似猜燈迷，換到好多禮物，但係依家冇晒。」王太續說。
「我住咁多年，最難忘係馬鞍山鐵路通車，當年商場有免費派馬鞍山鐵路嘅列車模型，係先到先得咁派，我見一班左鄰右里一大清早7點去排隊，見商場打咗好幾個大蛇餅，排到11點先開始派」。最終鄰居送了一架模型列車給王太，她至今仍很感謝該名鄰居，更將列車模型放在組合櫃內留念。
街坊難忘童年食玩買
8年前在第一城上車的胡先生直言：「屋苑雖然樓齡有番咁上下，但睇嚟都仲好乾淨同整齊，而且商場喺大維修之後靚咗好多。我未諗賣樓，始終自己住緊，都會留番自住。」
在屋苑長大的辛小姐認為現時要在屋苑置業仍然艱難，只能等機會，「我對沙田第一城有好好嘅童年回憶，仲記得我同阿妹趁阿媽剪頭髮，我哋喺舊商場四圍走兼買閃卡、睇文具同抽啷啷嘅情景。仲諗起細個成日玩攤位遊戲，換咗好多禮物嗰份喜悅。嗰時最鍾意去『食之家』食魚蛋粉，不過間舖頭已經唔喺度」。