新聞類別
財經
詳情#
【明報專訊】無綫股權變天，包括小琴在內，大家都好關心，話晒好多人都係睇住TVB嘅節目長大㗎嘛。新老闆係有「殼王」之稱嘅陳國強，同埋王永慶女兒兼HTC創辦人王雪紅。正當外界都講緊係咪背後有大財團，支持陳國強買TVB嘅時候，殼王終於出嚟澄清啦。話說陳國強前日選擇性接受咗3份報章嘅訪問，喺訪問中話收購邵氏兄弟入主電視廣播係佢嘅個人投資，符合牌照要求，仲話未來電視廣播會向新媒體方向發展咁話。
喺訪問中，陳國強否認電視廣播總經理陳志雲從中穿針引線，而陳志雲噚日一早返電視城嘅時候，係電視城等候嘅記者當然唔放過佢啦。問陳總知唔知陳國強選擇性接受3家傳媒集團訪問，佢就話唔知道，仲反問番記者係邊3間媒體，話會留意睇番。然後，陳總仲話咁反而證明TVB獨立唔會有特權，佢個人覺得係好事。對於TVB會唔會爭取訪問陳國強，佢話相信當一切落實後，會有大型記者會喎。
其實，近年TVB新聞部都成日被抨擊，一時就被「是旦男」諷刺「無綫新聞，是是旦旦」，一時就畀網友譏諷為「CCTVB」，畀殼王同王雪紅入主後，亦有人擔心TVB會「台灣化」。今次陳總話TVB新聞部唔會有特權訪問新東主，唔聲唔聲又為TVB嘅獨立自主加分啦。
報料電郵﹕piano@mingpao.com
留言 (0)
