財女手筆：新盤招標將成歷史

【蘋果日報】上星期寫到發展商為求盡快去貨，劈價求售。估唔到即晚某樓盤即將貨尾劈價，不過呢頭有發展商降價，另外亦有發展商選擇唔減價，招標賣樓。
喺跌市之下，新盤滯銷，滯銷原因除咗因為市場氣氛轉差嚇怕投資客外，新盤定價遠超二手亦係主因之一，簡單講即係開錯價。市旺，新盤開咩價都有人買，越賣越貴，加價加推；市差，越賣越平，減價減推亦係常態。然而，面對未來幾年海量供應，外加超多貨尾堆積如山，個別發展商唔敢帶頭減價觸發骨牌效應推跌樓市，所以改用招標形式賣樓。
以前只有山頂豪宅會用招標，因為想買嘅人多，發展商於是拒絕定價，用入標價高者得，將利潤最大化，亦減低開錯價嘅風險。依家，成個盤百幾伙都招標。當然，發展商咁做可以避免定錯價，導致公開賣樓入票不足，到賣樓日售樓處水靜鵝飛嘅尷尬。不過，全盤如果過千個單位，你招標唧牙膏賣樓，分分鐘賣到2047年都未散到貨。
如果發展商本身齊心拒絕減價，「Strong hold」慢慢賣，你全盤過千個單位一齊招標絕對無問題。不過現實總係殘酷，喺跌市之下，要錢唔要貨是常識。當人地劈價求售時你按兵不動，玩招標，只不過將市場僅有嘅購買力送畀人，到頭來可能要劈得狠過對面先可以清貨。發展商之間本身亦係競爭對手，無人會同錢作對，所以新盤招標唧牙膏賣樓好快會成為歷史，大家鬥劈價爭奪市場會成為明年樓市嘅主旋律。
Melody
http://fb.com/whichroad