財經專題：篤信風水　套現千萬靚太賣兩屋換星漣海

【蘋果日報】80後幸福少奶梁太原本一家四口住西貢700呎村屋，惟兒子日漸長大，再聽風水師狠批自住村屋不利健康、阻住老公事業發展，一於賣出村屋及沙田第一城套現，並以1,800萬元換入長實（1113）星漣海。屋苑遲近半年才交樓，又聽講長實樓質素麻麻，令她有點擔心。
記者：陳家雄
梁太婚後與丈夫定居西貢村屋，一直沒有置業煩惱，早年「老公同朋友傾偈，有啲多餘錢，唔知投資乜好，朋友建議買磚頭，放租出去，等人哋幫你供樓。老公講買樓嗰陣，都覺樓價貴，但唔似會跌，不如試吓囉！」結果以約480萬元購入沙田第一城一個實用451方呎單位，「後尾賣咗760幾萬，其實樓價不停升緊，好彩都買咗，升咗值」。
原住西貢 兒子上學不方便
兒子於大圍讀書，校巴不能直達西貢，令她接送上學不方便。去過朋友馬鞍山海典居，區內不少單位都有海景，於是和老公計劃換樓，睇勻馬鞍山新盤，認為薈晴薈朗太細、雲海太貴、迎海太密，其他新盤未起好，星漣海價錢算合理，「馬鞍山普遍單位呎價1.8萬至1.9萬元，當時呢度呎價約1.5萬元」。
篤信風水命理的梁太坦言事前問過風水師，「開頭只係問『西貢呢間屋繼續住落去好唔好？』佢一講，就講到我健康會有問題，尤其腸胃，呢方面無同佢講過，但其實我已開始呢個問題。佢又話住落去，老公事業發展有阻滯」。風水師一言，加速其換樓決定，於是賣掉沙田第一城及西貢村屋套現逾1,000萬元，換入長實星漣海。
看過3個心儀單位，最終以1,800萬元買入實用1,122方呎的四房單位，「買入個單位並非最好，師傅話同層C室最夾我哋一家，但望出去係樓景，間屋黑麻麻，現時買咗呢間係第二位，缺點係欠文昌位，差少少，但都可以接受。其實最想買18樓，但佢留低4個字『不要也罷！』其實想問多幾個風水師傅，但老公話你不嬲信佢，就唔好再問啦！」她坦言計過數負擔得起才作決定。
梁太知道星漣海是長實樓，「之前冇特別諗，後尾聽人講就知質素普普通通囉！但又聽地產講，啲料會用得好啲，好似想幫自己執返靚個招牌，但都擔心好多嘢要執漏，總之唔漏水，冇乜大問題就ok」。
長實多次遲交樓 無奈硬食
原本關鍵日期是今年6月30日，但長實接二連三遲交樓，無奈硬食，「問親佢，都話天氣關係，所以就再延遲，但我唔buy呢個理由，應該其他發展商都是呢個理由，惟有不停追，追agent、追長實，又搵律師出信問佢乜事」。
自住村屋賣掉，新樓亦會裝修，梁太租了迎海單位暫住，但長實遲交樓，由租四個月延長至半年，慶幸本月最終收樓，入屋前只希望無大問題，驟眼看無發現，但始終不太熟悉，初步畀單位80分，事關驗樓一竅不通，扣分位說是污糟，最擔心的漏水就未試。