會師中環：Big4中層同被壓榨

【蘋果日報】入Big4做核數通常有兩個里程碑：做夠3年及5年。做3年，就夠你拎到會計師牌；做5年，你就可以升經理。很多人認為做到經理級脫離「揼石仔」階段，以為開始「甩難」。但這種認知是不對的，雖然很多經理都沒有「被壓榨」的覺悟，但其實他們跟低層員工一樣，都是被公司用到盡。
先講人工，Big4頭幾年人工升幅最為可觀，到經理級時便開始減慢。不過近幾年低層員工人工增速加快，但經理級卻追唔上，結果導致一個奇怪現象，就係剛升經理時，人工隨時冇得加。究其原因，係因為剛升經理時雖然月薪有所增加，但相對低層員工卻不獲公司加班補水，結果兩件事拉上補下，便令整體人工無甚加幅，這亦是近年初級經理經常投訴「人工少過下面」的原因。
再講工作，近年經理級加班時數有上升趨勢，整體雖不及低層辛苦，但絕對不是舒服。現時Big4低層流失率極高，而且亦因成本問題削減人手，結果導致工作量向上移，不少經理都要做埋「下面嗰份」，更不要提沒完沒了的瑣碎行政工作。某些老闆甚至睇準經理搵工「高不成低不就」、難以辭職的尷尬處境，將經理的使用量推向極限。當然，現實中不少經理都會壓榨員工，但這改變不了他們同被壓榨的事實。這種層壓式的工作環境，導致民怨累積，絕對是業界要正視的問題。
神仙丁
《審計搵丁》負責人
http://facebook.com/AuditSlave/
本欄逢周五刊出