老饕慕名而來　嘆隱世豬扒瓦煲奶茶

【蘋果日報】周五下午3時多，原本是尖沙嘴上班族午膳飯堂的海防道臨時街市中的熟食市場已回復靜謐，檔主或挨站在排檔前，或坐在椅子上小休片刻。然而，佔據中間位置的華香園5張圓桌卻依然各坐了客人。62歲的老闆巫先生在小檔口中忙着炸豬扒、沖奶茶；28歲的女婿Rin則負責招呼客人，豬扒送完一碟又一碟。好一會兒後，巫先生終於忙完，在木椅上蹺着二郎腿，燃起香煙，以一貫牙擦擦的口脗說：「以前由朝忙到晚呀，邊有得坐低慢慢同你做訪問呀！」的確，華香園的秘製豬扒和瓦煲奶茶遠近馳名，不少人專程走入海防道街市，就是為了一嚐這「隱世美食」。而美食背後，是巫先生接近五十年的心血。
秘製豬扒太太也不知
70年代時，10多歲的巫先生跟着大哥在旺角登打士街上擺熟食排檔。至1978年，二人獲市政局安置於海防道街市熟食市場。相較其他檔主，巫先生算是晚輩，眼見全部人都在賣奶茶、咖啡、粉麵、三文治，他決心要以獨門秘製豬扒殺出一條血路。起初，他為了研究豬扒調味配方，每天都吃豬扒，「食到厭晒、驚晒」，屢敗屢試後，巫先生終成功。就憑秘製豬扒，加上炸雞翼、鮮牛肉，配上白飯或粉麵，華香園闖出名堂，成為海防道街市熟食市場中最受歡迎排檔之一。
今日雖仍客似雲來，但相比昔日，仍是小巫見大巫。70、80年代，除了位於現時海運大廈的海洋皇宮酒樓和海防道街市熟食市場以外，尖沙嘴甚少餐廳食肆，海防道街市排檔因而成了九龍倉船塢（即海港城前身）工人的飯堂，生意極興旺。巫先生每天凌晨4點就來到華香園，獨自在這狹小空間醃豬扒。「我唔畀人睇㗎，冇人知我點醃，連我老婆都唔識，如果唔係點叫秘製呀！」一箱55磅的幾百塊豬扒，他一天最少醃兩箱，最多醃4至5箱。華香園最巔峰時，巫先生一天能賣6箱豬扒。他向記者展示他已變形的右手食指和中指：「我嗰陣係直接用手指放豬扒落去油炸！已經忙到儍咗！忘我呀！」
在這個小檔口風光了足足40年，隨着11月30日開始的熟食市場重建工程，華香園將與食客暫別14個月。說起重建，巫先生大表支持，他往上指指穿了大洞的屋頂說：「依家每次落親雨，呢到都瀑布咁樣，你喺度游自由式、蝶式都得呀！冇客入嚟時，個人就會冇晒鬥志，會唔想做。」他也受不了這裏的高溫，熟食市場40年來無冷氣、只靠幾把牛角扇。夏天時室內溫度達40℃，迫使華香園每年也要放一次暑假。「我搵夠就算，太熱就唔開。同埋啲肉太熱會變壞，有雪櫃都冇用。一日倒十零廿磅，個心就好痛，好折墮」。
誓言重建前帶走招牌
但支持重建之餘，巫先生難免也不捨相伴40年的人及事物。看過新圖則的他指，重建後，熟食市場將「從上至下完全唔同晒」：「到時9檔間開晒，啲枱枱凳凳自己還自己」。他趕忙叫熟客趕快回來與熟食市場影「遺照」：「呢到最主要係懷舊，係集體回憶，等佢哋留畀子孫睇下，唔影就冇。」他也誓言要在重建前帶走華香園招牌：「其他嘢九成九都唔要，重新再嚟過冇乜所謂，但乜都係咁變，惟獨呢個招牌從來冇變過。」
縱有欷歔，但長痛不如短痛，若重建工程能讓熟食市場揮別污糟邋遢，長遠而言仍然值得。巫先生也在兩年前開始培育華香園接班人，「我已經吩咐我女婿，點都要保住呢個秘製豬扒」。
28歲的女婿Rin逢周一至五都在華香園幫忙，同時也在鑽研岳父的秘製豬扒。同樣支持重建的他，卻感海防道熟食市場和華香園的未來滿佈陰霾。「可能裝修完又俾領展收購呢？到時租貴到根本唔使做，唔係冇前例呀嘛。俾領展收嗰啲十個死九個，剩返個一個又係白做，只夠交租」。全場最年輕的他說：「有時逼人太甚，都唔係你想做就有得做。到時唔使灰，已經唔使再諗」。