麥包買環海．東岸：預咗要還

【蘋果日報】九建（034）「劏房之城」紅磡環海．東岸有望下月入伙，3年前淡市推「呼吸plan」搶客，最誇張九成半高息貸款。藝人「麥包」麥長青（圖）接受訪問坦言，當初被九成半按揭吸引，以約420萬元買入一房單位，當中一成半向發展商貸款，「預咗要還」，有信心承擔供款才會入市投資。
3年前環海．東岸推「開心直通車計劃」，付5%首期後，每3個月付樓價0.35%至入伙，餘約八成半可向九建旗下「財仔」借一按或二按上會，免入息證明。這種勁易借高成數按揭被統稱為呼吸plan，意指買家只要有呼吸就可借貸。
麥憶述：「因為有九成半按揭所以買，嗰時我有信心供到，但冇錢畀首期。」結果當年以約420萬元買入低層一房戶，一按八成向銀行承造，二按一成半向發展商借，「由day one已預咗要4年內還一成半二按，有筆錢去還呢條數」。價單顯示二按貸款首48個月息率P減3.1厘（當時P為5.25厘），其後年利率為P加0.75厘，可分30年攤還，目前仍屬首48個月息率，保守估計月供1.5萬多元。
「大市唔關小市民事」
經歷過97樓市暴瀉後蝕讓，今日樓市轉勢，「我冇動搖，買樓為乜嘢先。自用好，第時畀仔女都好，諗吓自己當日點解要買樓……樓市冇包生仔，世界會唔會打仗，你點知？」目前舉家居住早年買入的鰂魚涌單位，「依家留（環海．東岸）畀細路仔，其實即係自用咋嘛……唔好理大唔大市，其實大市唔關我哋小市民事。大唔大市係關啲炒嘅事」。