港故事：維修達人　電視半生緣

【蘋果日報】曾幾何時，在電視機前面坐定定收看一年一度的選美盛事，以及追看大台的電視劇集都已是生活的一部份，隨着其他娛樂節目越來越多，「電視汁撈飯」的歲月已不復再，加上科技推陳出新，電視機價錢也越來越便宜，在這情況下，如今要找師傅上門修理電視機真是談何容易。修理電視機和天線足足半世紀的樊偉文，早有隨時結業的準備：「同我同年紀仲做緊嘅好少，冇幾多個！做咗咁多年，應該係退落嚟嘅時候，唔會欷歔！」
撰文：張珮琪
攝影：張家豪
由西營盤港鐵站德輔道西出口，橫過電車路沿東邊街直行，街角一個有多個據點的短期租約迷你工作室，多是創業者租用經營時裝、精品、美甲等，樊師傅的6呎乘4呎舖頭置身其中，有種違和感。他的小小空間內，用的是鑽石牌掛鐘；保留着客人留給他、無法修理的70年代5吋黑白電視機。年近70的樊師傅在西營盤搬過3次舖，初時在橫街開舖，沙士舖租便宜搬去大街，到興建港鐵加租大舖搬細舖，去年初更加入格仔舖行列，亦意味這個行業正走向夕陽之路。
「西營盤幾乎個個都識我，你搵唔到我嘅話，問一問任何一個街坊都會指你去我間舖。」
「我1984年自己開檔做到依家，西營盤幾乎個個都識我，你搵唔到我嘅話，問一問任何一個街坊都會指你去我間舖。」記者問：「西營盤御用師傅？」樊師傅說：「唔敢當。」樊師傅保守估計區內修理電視機及天線的個案，七成經他手。「以前點解啲人會搵人修理電視機呢，因為以前電視機產量少，唔會好似依家咁成日推新款；第二，以前啲電視機好貴。」60年代初，電視機在香港是奢侈品，並非家家戶戶都有，但當年鄰里關係密切，有電視機的家庭會招呼左鄰右里一齊觀看有線收費電視「麗的映聲」，也可以落街給一角幾毫入場費在商舖收看電視播放的粵語長片。
「做呢行要講個信字，做得唔好企唔到咁耐！」
1965年當時16歲的樊偉文入讀無線電工程私校，學習電工、電機及無線電，1967年無綫開台，學校才開辦電視課程，他讀了半年就畢業。無綫開台之後，電視機開始融入每個家庭，樊師傅透露1968年第一份工在山寨廠打工：「老闆接收唔同牌子嘅電視機返嚟修理，好多柯打，我入去學師，學到好多嘢。當年最流行西德機，根德、藍寶；日本機有TOSHIBA（東芝）、HITACHI（日立），冇雜牌機㗎。」首次上門修機，電視機畫面不停跳動，音量掣無法調校，「我就加個電阻，加完掂晒，自己覺得最開心，我最有印象，因為自己解決咗問題」。
轉過工，80年代修理廠結業北移，樊師傅當了16年打工仔後自立門戶。最忙的日子，放工回家「飯都未食」就要幫街坊修理電視機。經歷由俗稱「大牛龜」的顯像管電視機，到Plasma、LCD、LED、4K OLED，機身厚度變薄，更講求畫質，「依家啲人都唔整電視機，至多叫師傅睇吓有冇得整，平就整，貴就唔整，買過部好平」。
樊師傅指出，以前厚背電視機的零件獨立及外露，可以逐樣測試問題出處，現時的平板機零件幾乎是隱藏式，「拆唔到、換唔到」，試過由朝到晚坐冷板凳。他又稱：「大牌子啲師傅舒服呀，唔使傷腦筋諗邊度壞，袋住幾塊電路板，換到得為止。我哋冇條件換咁多板，要檢查到邊一度壞先敢報價買零件」。說畢，他又以一貫哈哈哈笑聲作結。
講信用、價錢公道、手尾要跟足，是樊師傅多年來的宗旨，「做呢行要講個信字，做得唔好企唔到咁耐！」他的客源主要是住舊樓的街坊，天線錶是他的好幫手，「個客話接收唔到，我就會掹條天線插落去（天線錶）試吓睇吓有冇訊號，如果冇訊號就跟吓條天線，如果有訊號就係電視機壞，幫輕好多嘢」。他坦言跟手尾一環是最難纏，「譬如有啲天線冇事，但單位收唔到訊號就要逐層跟，睇吓係啲電視訊號放大器定係每層嘅分線器有問題」 。
不懂利用互聯網賣廣告的樊師傅，靠的是口耳相傳的口碑，數年前曾經有外籍人士找他修理電視機，他按客人的要求替他置換了組件，順利修妥，對方在討論區介紹他給其他有需要的外籍人士。西營盤多舊樓，近年隨地區發展高樓增加，包圍舊樓，部份舊樓的公共天線訊號接收受影響，樊師傅會通知通訊事務管理局，派工程師到場視察及檢查，「係唔係真係收唔到高清，佢要畀個報告，佢好樂意做，3個人嚟檢查，嗱，呢個位收到呀師傅，你裝（天線）呢個位啦！呢啲冇錢袋㗎，我都想客人收得好啲」。