張建宗死撐「似警察做義工」

【蘋果日報】駐港解放軍身穿軍服現身郊野公園參與風災善後，政務司司長張建宗（圖）昨解畫稱，有關清理行動是公益義工活動，又以警察做義工為喻，呼籲外界毋須過份演繹。但有立法會議員擔心「義工活動」定義不明，令解放軍可借義工之名，進行其他活動，令《駐軍法》失去規範。
公民黨黨魁、資深大律師梁家傑指，今次港府未有按《駐軍法》向駐港部隊提出協助要求，「卻有人搵解放軍着住迷彩軍服協助善後，咁樣同我一直理解，嚴格要求（駐軍）唔可以輕易離開軍營背道而馳」，他認為駐軍在港無論進行部操抑或軍事任務，甚至遊山玩水或做義工，都要受制於上述條件，「唔係做義工做大晒！」
議員憂開先例難規範
梁又形容張建宗以警察做義工為喻極度兒戲，強調「如果要開例（即容許駐軍隨便出動），攞做義工嚟開確實可能少啲非議，但違法就係違法，唔可以隨便開呢個先例」。
民主黨立法會議員林卓廷亦認為，張建宗以警察於星期日做義工，類比解放軍於郊區執垃圾，邏輯有問題，因為警察是香港的紀律部隊，自然可以幫忙處理香港事務；但即使解放軍是否做義工，穿上軍服執勤處理香港事務，必須先得港府邀請或求助。
公民黨立法會議員譚文豪認為，解放軍「着軍服出動就係軍官士兵，唔係義工！」，並質疑若解放軍以處理風災為由可隨便出動，日後駐軍行動難以規範，「六四、7.1又放幾百個解放軍幫手清理維園，坦克「保護」遊行人士，係咪要咁樣？」
港大法律學院首席講師張達明表示，若行動實屬義務工作，不應受《駐軍法》限制，但未來需要小心「掛羊頭賣狗肉」，不應有借義工之名，處理香港事務之實的情況。
翻查資料，張建宗去年11月一篇演辭提到，駐港部隊一直低調地為社區服務，包括參加植樹、捐血和扶老護幼等公益活動，駐港部隊自2000年起至去年已在香港種了9.2萬棵樹。
■記者曾偉龍