北上創業重關係「申請幾多專利都預咗俾人抄」

【蘋果日報】科研工程出身的謝智衡，承認本身不擅交際，但在內地必須花力氣學習如何跟投資者、合作夥伴搞好關係，「飲酒、食飯、吹水只係表面，我哋有個Partner好識打關係，更多係生活方面，平時關心一下對方，例如問吓『小朋友點呀』、『生活點呀』，中國係好鍾意咁做」。
「茶具一定要有」
謝智衡指着辦公室內的茶具說：「茶具係一定要有，佢哋鍾意坐喺度飲茶，建立關係係超越合作，唔單止商業利益，要係個人方面，咁先會有較強嘅基礎。」
要在內地建立人脈初時是很困難，但謝智衡認為這是必須的。神州大地，有好人有壞人，騙財騙技術的個案比比皆是，因此結識可信的夥伴非常重要，否則隨時一敗塗地，「我哋引入投資者，唔只睇錢，仲要睇佢有冇網絡，例如佢同十幾間醫院有關係，咁呢十幾間醫院就係你第一個關係網，然後再發展開去」。
另外，謝智衡認為，在內地做科研，一定要有被「抄考」的準備，「無論你幾擔心被人抄，申請幾多Patent（專利），都一定要快，當你公開申請第一個專利技術，就要有第二個技術準備，人哋抄我唔緊要，因我已經有用戶基礎、有新產品，仍然走喺你之前」。但謝智衡強調，公司關鍵的技術代碼，始終只有香港核心員工才可接觸得到。